الاثنين، 23 أكتوبر 2017
#جلوكوفاج #سيدوفاج
#أدوية #التخسيسالاسم التجاري #جلوكوفاج #سيدوفاجشير ومنشن لكل حد تعرفوه بياخدهم عشان يخس
المادة الفعالة #ميتافورمين
قبل ما ابدأ اتكلم عن السيدوفاج والجلوكوفاج احب اعرفكم ان استخدامهم كعلاج مع الدايت هو بدعة مصرية 100 % وحتى وقت كتابة هذا البوست : مفيش بحث واحد في العالم يوحد ربنا بيقول انه دوا تخسيس .. والله ما دوا تخسيس
بيعملوا ايه بقا ؟؟؟!!!
الادوية دي اصلا هي علاج لمرض السكر من النوع التاني لانه بيقلل افراز السكر من الكبد ، وبالتالي بيقلل نسبة السكر في الدم .. ده غير طبعا ان له استخدامات في علاج متلازمة تكيس المبايض
طب انا اخدت سيدوفاج وخسيت عليه ... ازاي بقا ؟؟!!
زي ما قولنا ان السيدوفاج او الجلوكوفاج بيشتغلوا عن طريق تقليل السكر اللي في الدم .. ورد فعل الجسم في الحالة دي بيكون في محاولة تعويض نسبة الجلوكوز في الدم عن طريق حرق العضلات .. فحضرتك تاخدي سيدوفاج من هنا .. السكر يقل في جسمك من هنا .. فجسمك يكسر عضلات من هنا .. فتخسي ، تمام !!!
طب ايه المشكلة .. ماهو بيخسس اهو ؟؟؟
المشكلة حضرتك ان جسمك بيكسر عضلات مش دهون .. ايوه طبعا الرقم اللي على الميزان بيقل بس دي العضلات يا جماعة .. دي الصحة اللي ربنا عاطيهالنا .. نكسرها كده بسهولة ... فطبعا لو اعتمدتي على السيدوفاج او الجلوكوفاج في التخسيس هتكون النتيجة كالاتي :
1. قلة القدرة على العمل او الحركة
2. حالة من الهزل والضعف
3. نزول منطقة الوش وظهور اعراض الاجهاد على البشرة واسفل العينين
4. زيادة جامدة في الوزن بعد انتهاء الجرعات
5. زيادة نسبة تساقط الشعر وتكسيره
6. صعوبة جامدة في تنسيق القوام وخصوصا لو بتشتكي من زيادة في الارداف
7. زيادة في نسبة فرص حدوث هبوط او اغماء
8. تأثيرات هرمونية في حالة الاستخدام لفترة اكتر من اللازم زي لخبطة في مواعيد الدورة عند النساء وقلة القدرة الجنسية عند الرجال (لانه طبعا بيكسر نسبة كبيرة من العضلات)
يا جماعة .. يا اخواننا
السيدوفاج والجلوكوفاج مش بينزلوا دهون .. ايوه بيخسسوا بس ده احد الاعراض الجانبية لطريقة عملهم ..
حمل تقيل اوي عالكبد والكلية لو انت مش مريض سكر
بيمنع الكبد من انه يمارس مهنته اللي ربنا خالقهاله (ده طبعا لو حضرتك مش بتعاني من السكر)
مش اي نزول عالميزان هو فقدان للدهون !!!
احذروا الايذاء بالصحة اللي ربنا وهبهالكم هدية .. حافظوا عليها
بطلوا بلبعة عالفاضي والمليان .. اسألوا حد بيفهم
لقراءة المزيد عن ادوية التخسيس
نبذة عن الأورليستات
مادة #الكروميوم
#ادوية #التخسيس
انهاردة هنتكلم عن مادة #الكروميوم
وهي المادة الفعالة لادوية كتير زي #كروماكس ، #كروميوم ، #كروميترون ، #توب_جينج ... وحاجات تانية كتير
نقدر نقول ومن غير مبالغة ان مادة الكروميوم هي المادة الأمن على الاطلاق في التخسيس وأثارها الجانية تكاد تكون لا تذكر
بتشتغل ازاي ؟؟!!!
مادة الكروميوم بشكل عام هي مادة محفزة لحرق الكاربوهيدرات (سكريات او نشويات) ، وزي ما كلكم عارفين ان الكربوهيدرات هي المصدر الرئيسي للطاقة في الجسم زي العيش والرز والمكرونة والسكر والعسل وهكذا .. ده غير انها موجودة ولو حتى بنسب صغيرة في كل الاكلات تقريبا زي اللحوم والفراخ واللبن والزبادي والبيض
يعني ممكن تنفعني ؟؟!!
طبعاً ممكن ، لان زي ما قولنا قبل كده المادة دي تقريبا ملهاش اي اثار جانبية .. سواء مريض ضغط او سكر او قلب او حتى تحت 18 سنة ، لانها آمنة من اول 12 سنة تقريباً
طب ايه مشكلتها ؟؟!!
مشكلة الكروميوم تكمن في بطئ المفعول (ودي احد الاسباب اللي مخلياه آمن) ، بس الجرعة المعتادة لانقاص الوزن هي كبسولتين قبل كل وجبة بربع ساعة ، يعني 6 كبسولات يومياً ، لمدة لا تقل عن 14 يوم متواصلة وصولاً ل3 اشهر تقريباً ... لكن النتيجة دي بتتضاعف مع مرضى السكر لانه بيساعد في تقليل نسبة السكر في الدم بشكل غير مباشر .. في العادي ممكن يخسس (بالجرعة اللي قولنا عليها) من 500 جم لكيلو واحد كل اسبوعين ، ودي طبعاً نتيجة قليلة جدا مقارنة بسعر الدوا
طب امتى اقول بلاش منه ؟؟!!
1. حرقك لو سريع جدا يبقا وفر فلوسك لان النتيجة اللي هيضفهالك مش هتحس بيها اصلا
2. حرقك لو بطئ مش كافي اطلاقاً لوحده كعلاج لزيادة معدل الحرق
3. لو نسبة السكر في الدم عندك بتوطى ، او ممكن تكتفي بكبسولة واحدة قبل كل وجبة
4. لو عندك حساسية من مادة الكوميوم وخصوصاً لو بتاخد #كروميترون لانه مش كروميوم بس
مواضيع قد تهمك أيضا
نبذة عن ادوية التخسيس المستوردة
الاسم التجاري: تربوسليم هارفا فيتارم ستارفيكس سليمينج الأحمر والأزرق وجميع منتجات شركة #ماجيستيك بلا أي إستثناء
المادة الفاعلة : سيبوترامين
المادة الفاعلة : سيبوترامين
في ظل إنعدام الرقابة الصحية وغياب الضمير والأمانة ، تنفجر ماسورة (أدوية سد الشهية) والتي تحتوي أساساً على مادة #السيبوترامين وهي مادة تعمل على مركز الشبع في المخ ونزول الوزن بشكل ملحوظ في اقل وقت
المادة دي اتمنع استخدامها دولياً ، حتى في مصر ممنوع استخدامها بشكل قانوني .. لكن للاسف مازالت مصانع بير السلم تعمل بكامل كفاءتها ، القاعدة الاولى في الطب Do No Harm يعني لا تسبب أي أذى لكن للاسف ان بنلاقي زملاء أفاضل (عن جهل أو عمد) بيمشوا مرضاهم من مرضى السمنة على ادوية من دي
المادة دي اتمنعت في مصر بعد كارثة بكل المقاييس إذ وجد اكثر من 20 حالة وفاة مفاجئة في عام واحد ، وكان القاسم المشترك الوحيد بين المتوفيين هو انتظامم على ادوية تحتوي على سيبوترامين قبل ما يتم منعه زي #سيبوتريم و #دايت_ماكس
الأعراض الجابية لمادة السيبوترامين
1. نزول الوزن بيكون من المياه والعضلات اكتر منه من الدهون لان الجسم مش بياخد كفايته من العناصر الغذائية
2. لخبطة عامة في كيمياء المخ تؤدي الى تقلب حاد وسريع في الحالة المزاجية قد ينقلب لإكتئاب مرضي
3. ارتفاع ضغط الدم
4. هبوط حاد في نسبة السكر في الدم
5. تقليل عمل الخلايا المتجددة فيسبب تساقط الشعر وضعف الاظافر
6. تغييرات هرمونية تؤدي إلى اختلال مواعيد الدورة عند النساء او ضعف في الاداء الجسدي عند الرجال
7. زيادة في الوزن بعد التوقف عن تعاطي الدواء
8. الموت المفاجئ إثر سكتة دماغية
1. نزول الوزن بيكون من المياه والعضلات اكتر منه من الدهون لان الجسم مش بياخد كفايته من العناصر الغذائية
2. لخبطة عامة في كيمياء المخ تؤدي الى تقلب حاد وسريع في الحالة المزاجية قد ينقلب لإكتئاب مرضي
3. ارتفاع ضغط الدم
4. هبوط حاد في نسبة السكر في الدم
5. تقليل عمل الخلايا المتجددة فيسبب تساقط الشعر وضعف الاظافر
6. تغييرات هرمونية تؤدي إلى اختلال مواعيد الدورة عند النساء او ضعف في الاداء الجسدي عند الرجال
7. زيادة في الوزن بعد التوقف عن تعاطي الدواء
8. الموت المفاجئ إثر سكتة دماغية
وطبعا الاعراض دي بتختلف من حد للتاني ..
الادوية دي واولهم طبعا #تربوسليم من إنتاج شركة #ماجيستيك (اللوجو بتاعها عبارة عن حرف M وعليه تاج) وبتدعي انها صناعة استرالية .. لكن انا جبتلكم لينك من الحكومة الاسترالية نفسها بتحذر من الدوا ده ومن الشركة دي تحديدا برغم ان العلبة مكتوب عليها انه طبيعي تماما ومن منتجات عشبية
https://www.tga.gov.au/alert/majestic-slimming-capsules
https://www.tga.gov.au/alert/majestic-slimming-capsules
وانت نفسك لو كنت اشتريته ، ابعت اي رقم من دماغك على الرقم اللي هما حاطينه عالعلبة للتأكد من ان المنتج اصلي (بخلاف طبعا انهم كاتبين انه استرالي لكن الرقم موبايل 010) لكن هتلاقي ان في رسالة جتلك بعدها بتقولك مبروك المنتج اصلي .. هجاااااااااااااايص !!!
ابتعدوا عن الادوية دي وعن اي دوا عليه لوجو ماجيستيك وارجو من السادة الزملاء توخي الحذر الشديد في كتابة ادوية التخسيس .. وارجو من كل الناس الابتعاد عنها تماما
لقراءة المزيد عن ادوية التخسيس
الاشتراك في:
الرسائل (Atom)