مادة #اورليستات
بتعمل ايه ؟؟ وبتشتغل ازاي ؟؟
المادة دي بتمنع الجسم من امتصاص تلت الدهون اللي موجودة في الوجبة .. ملهاش دعوة خالص بالدهون الموجودة في الجسم او الدم .. وبتخلي تلت الدهون دي تنزل في البراز زي ما هي وده اللي بنسميه الاسهال الدهني .. تقوم سعادتك تقول (ياااااه كل دي دهون نازلة من جسمي !!!!) والحقيقة ان دي دهون في الاكل نفسه يعني لو جربت تاخد الاورليستات مع سندوتش جبنة مثلا مش هتلاقي اي نتيجة بتحصل نهائيا
امال بيخسس ازاي طالما مش بيجي ناحية دهون الجسم ؟؟
التخسيس بالادوية دي بيعتمد على انه يقلل عدد السعرات الحرارية اللي داخلة جسمك .. مثال : لو بتاكل اكلة فيها مثلا 90 جم دهون (يعني 810 سعر حراري) الاورليستان بمنع الجسم من امتصاص 270 سعر منهم (30 جم .. تلت ال90جم) وبكده بعد مرور شهر تقريبا يجيب نتيجة معقولة على الميزان .. بس بعد كده يبدأ مفعوله يقل لغاية ما يبقى معدوم وتضطر في الاخر يا اما تسيب النتيجة اللي وصلت ليها او تمشي على نظام غذائي (مكان مالاول !!!)
ينفع اخده امتى يعني ؟؟
لو عامل دايت مع نفسك بدون متابعة ومحتاج حاجة تساعد .. او ماشي بنظام غذائي متوازن ممكن تستخدمه في الوجبات المفتوحة او المناسبات او الاعياد
طب ايه مشاكله ؟؟ والاعراض الجانبية ؟؟
اولا .. مشاكل هضمية زي كركبة المعدة والاسهال الدهني والغازات المستمرة واللي بتعرضك لمواقف محرجة برا البيت
ثانيا .. بتزود نسبة تكوين الحصوات المرارية والتهابات القولون
ثالثا .. بيظهر ضعف في الاظافر والشعر والبشرة نتيجة قلة امتصاص فيتامينات A,D,E,K
رابعا .. الريباوند .. يعني لو مش مصحوب بنظام غذائي
هترجع تزيد كل اللي انت خسيته
خامسا .. التكلفة المادية لان اقل سعر للشريط هو تقريبا 33ج يعني هتصرف على الاقل 320ج عشان تشوف نتيجة ملحوظة هتضيع منك في لحظة بدون دايت
***هذا البوست هو للتوعية والمعرفة وليس لاعلان عن منتج معين او ضد شركة معينة .. فالغرض منه هو توعية عامة عن المادة الفعالة ذاتها دون الاشارة عن منتج بذاته
لقراءة المزيد عن ادوية التخسيس
ليست هناك تعليقات:
إرسال تعليق